Лого Лого-пв-уз

    «Ўзбекистон ва Франция ўртасидаги муносабатларни ривожлантиришнинг ютуқлари ва истиқболлари» мавзусида халқаро конференция бўлиб ўтди

    2022 йил 18 майда Жаҳон иқтисодиёти ва дипломатия университетида Ўзбекистон Республикаси ва Франция ўртасида дипломатик муносабатлар ўрнатилганининг 30 йиллигига бағишланган «Ўзбекистон ва Франция ўртасидаги муносабатларнинг ютуқлари ва ривожланиш истиқболлари» мавзусида халқаро илмий-амалий конференция бўлиб ўтди.

    Унда сенаторлар, Ўзбекистон Республикаси Олий Мажлиси депутатлари, хорижлик дипломатлар, ЖИДУ профессор-ўқитувчилари ва талабалари, халқаро ташкилотлар вакиллари, оммавий ахборот воситалари вакиллари иштирок этди.

    Олий Мажлис Сенати Раисининг биринчи ўринбосари, ЖИДУ ректори Содиқ Сафоев тадбирни очар экан, Ўзбекистон Францияни ўзига хос тарихий ва маданий меросга эга мамлакат, улкан иқтисодий салоҳиятга, илмий-техникавий ва интеллектуал салоҳиятга эга дунёдаги энг йирик саноат марказларидан бири, халқаро майдондаги самарали ва ўзаро манфаатли ҳамкорликнинг муҳим ҳамкорларидан бири, деб билишини таъкидлади.

    Мамлакатимиз мустақилликка эришган дастлабки кунлардан бошлаб Франция-Ўзбекистон муносабатлари тенг ҳуқуқли ҳамкорлик ва ўзаро ишонч руҳида жадал ривожланди. Ўзбекистон Республикасининг ташқи сиёсати концепциясида Франция Республикаси билан ҳар томонлама ҳамкорликни ривожлантириш мамлакатимиз дипломатиясининг устувор йўналиши сифатида эътироф этилган.

    Ўзбекистон Республикаси Президенти Шавкат Мирзиёев 2018 йил октябрь ойида Европа қитъасига илк давлат ташрифини айнан Франция Республикасидан бошлагани бежиз эмас. Парижда Франция Президенти Э.Макрон ва Сенат Раиси Ж.Ларше билан учрашувлар, Франциянинг йирик компаниялари раҳбарлари билан учрашувлар, Луврдаги суҳбат мамлакатларимиз ўртасидаги ҳамкорликнинг янги истиқболларини очиб берди.

    Дўстлик, ўзаро ҳамжиҳатлик ва очиқлик руҳида ўтган самарали музокаралар жараёнида кун тартибидаги барча масалалар бўйича ёндашув ва қарашларимиз ўхшашлик ва яқинликни намоён этди.

    Бугун биз кейинги беш йил давомида Ўзбекистон-Франция муносабатлари деярли барча соҳаларда янги сифат босқичига кўтарилганини ишонч билан айтишимиз мумкин.

    Турли даражадаги икки томонлама учрашувларнинг мунтазам ўтказилаётгани ўзаро ишонч муҳитини мустаҳкамлаш ва муносабатлар самарадорлигини оширишга хизмат қилмоқда.

    Икки давлат ўртасидаги парламентлараро ҳамкорлик фаол ривожланмоқда. Биз Франция Сенатида тузилган «Франция-Ўзбекистон» парламент гуруҳи фаолиятини юксак қадрлаймиз.

    Ўтган давр мобайнида Ўзбекистон билан Франция ўртасида конструктив сиёсий мулоқот, савдо-иқтисодий ва маданий-гуманитар ҳамкорликнинг самарали механизмлари йўлга қўйилди.

    Бугунги кунда Ўзбекистонда Франция капитали иштирокидаги 44 та корхона фаолият кўрсатмоқда, Airbus, Total Eren, Eiffage, Thales, Vinci, Rungis, Orano, Suez каби компаниялар билан қўшма лойиҳалар амалга оширилган.

    Савдо-иқтисодий ҳамкорлик бўйича Ўзбекистон-Франция ҳукуматлараро комиссиясининг саккизта мажлиси бўлиб ўтди. Учрашувлар якунлари бўйича мамлакатлар ўртасидаги иқтисодий, молиявий, техник ва сармоявий ҳамкорликни чуқурлаштиришга қаратилган қатор муҳим ҳужжатлар имзоланди.

    1988 йилда ташкил этилган Париждаги Темурийлар санъати ва тарихини ўрганиш ассоциацияси ҳамда қарийб 20 йилдан буён фаолият юритиб келаётган «Авиценна-Франция» жамияти фаолиятини алоҳида таъкидлаш лозим.

    Йилига 10 миллионга яқин сайёҳ ташриф буюрадиган Париждаги Лувр музейида шу йил охирида «Марказий Осиё улуғворлиги: Ўзбекистон савдо карвонлари чорраҳасида» номли ноёб кўргазма очилиши режалаштирилган. Луврга ташриф буюрувчилар мамлакатимизнинг қадимий тарихи, ўрта асрлар ва Темурийлар даврига бағишланган экспонатларни томоша қилишлари мумкин бўлади.

    Бундан ташқари, Париждаги Араб дунёси институти билан ҳамкорликда «Ипак йўли» номли уч томонлама тарихий ашёлар кўргазмасини ташкил этиш режалаштирилган.

    Ўзбекистонда 280 мингдан ортиқ талаба француз тилини ўрганади, 1 260 та мактаб ва 9 та университетда француз тили ўқитиляпти.

    Бу ютуқлар Франциянинг Ўзбекистондаги Элчиси Аурелия Бушез хонимнинг маърузаларида батафсил ёритилди.

    Ўзбекистоннинг Франциядаги Элчиси Сардор Рустамбаев, ЮНEСКО ваколатхонаси раҳбари, ЖИДУнинг 1995 йил битирувчиси Бобур Тухтабаев, «Тошкентдаги Француз альянс» раиси Ш.Минаваров, Франциянинг Ўзбекистондаги собиқ элчилари жаноб Жан-Пер Везиан, Виолен Биет де Вилмёр хоним, Изабел Сервоз-Галлуччи хоним, Ўзбекистон Республикаси Олий Мажлисининг депутати, ЖИДУнинг 1995 йил битирувчиси, профессор Қодир Жўраев икки томонлама муносабатларда эришилган муваффақиятларни юқори баҳолаб, Ўзбекистон билан Франция ўртасидаги ҳамкорликни янада кенгайтириш учун улкан салоҳият мавжудлигини таъкидлади.

    Франция халқаро муносабатлар институти илмий ходими Микаэл Левистон «Ўзбекистоннинг Марказий Осиё минтақасидаги ўрни: Франциядан назар» мавзусида қизиқарли маъруза қилди.

    ЖИДУ Романо-герман тиллари кафедраси мудири В.А. Маматқосимова, ЖИДУ докторанти Тошев Отабек, ЖИДУ талабалари Мадина Ғаниева, Ойдин Каримова, Бобур Абдуғаниев француз тилида табрик сўзлари билан сўзга чиқди.

    Тадбир давомида Франциянинг Ўзбекистондаги Элчиси Аурелия Бушез хоним ЖИДУнинг бир қатор нуфузли талабаларига «ЖИДУда 2022 йилда француз тили бўйича энг яхши мутахассис» махсус сертификатларини топширди.

    Анжуманда Франциянинг Ўзбекистондаги элчихонаси дипломатлари жаноб Лоран Ориол, Маева Годар хоним, Франция ривожланиш агентлигининг Ўзбекистондаги директори жаноб Венсан Копеном ва бошқалар ҳам қизиқарли маъруза қилдилар.

    Шу билан конференция ўз ишини якунлади.

    Ўзбекистон Республикаси Олий Мажлиси Сенати Ахборот хизмати.

    No date selected
    июл, 2022
    1
    2
    3
    4
    5
    6
    7
    8
    9
    10
    11
    12
    13
    14
    15
    16
    17
    18
    19
    20
    21
    22
    23
    24
    25
    26
    27
    28
    29
    30
    31
    Use cursor keys to navigate calendar dates