Бу ҳақда Kazinfrom агентлиги ҚР Туризм ва спорт вазирлигига таяниб хабар берди.
4 кунлик халқаро темир йўл саёҳати туристларга қадимий шаҳарлар атмосферасига шўнғиш ва Буюк Ипак йўли изидан саёҳат қилиш имконини беради. Йўналиш Туркистон ва Тошкентнинг асосий диққатга сазовор жойларини ўз ичига олади. Сайёҳларга қулайлик яратиш мақсадида экскурсия дастурига гидлар ёрдами, овқатланиш, транспорт хизматлари ва кириш чипталари киради.
“Биргаликда олиб борилган саъй-ҳаракатлар натижасида биз икки давлатни боғлайдиган ноёб поездлар саёҳатини яратишга муваффақ бўлдик. Бой маънавий-тарихий меросни ўрганишни хоҳловчи фуқароларимиз ва бошқа мамлакатлардан келган сайёҳлар учун саёҳат янада қулай ва ҳамёнбоп бўлади. Бу Қозоғистон ва Ўзбекистон ўртасида туризмни ривожлантириш ва маданий алоқаларни мустаҳкамлашда муҳим қадам бўлди”, - деди ҚР Туризм ва спорт вазири ўринбосари Ержан Еркинбаев.
Саёҳатчилар Марказий Осиёнинг энг қадимий шаҳарларидан бири – муҳим савдо тармоғи бўлган Ўтрорни кўришлари мумкин бўлади.
Саёҳат дастуридан Аристон бобо мақбараси, “Ҳазрат Султон” тарихий-маданий қўриқ-музейи, Марказий Осиёдаги энг йирик “Карвонсарой” сайёҳлик мажмуасига ташриф буюриш ҳам ўрин олган.
Тошкентда экскурсия иштирокчиларига нафақат тарихий жойлар, балки шаҳарнинг замонавий тараққиёти билан ҳам яқиндан танишиш имконияти яратилган.
