Мамлакатимизнинг Лондондаги элчихонаси томонидан Ўзбекистон Вазирлар Маҳкамаси ҳузуридаги Хорижий тилларни ўрганишни оммалаштириш агентлиги ва Буюк Британиянинг Ноттингем Трент университети (Nottingham Trent University, NTU) ўртасида музокаралар ташкил этилди.
Музокараларда агентлик директори ўринбосари Азимжон Ҳусанов, NTU ҳузуридаги Ноттингем тиллар ва маданий алмашинув институти раҳбари Франк Аустермюль ва бошқалар қатнашди.
Томонлар ҳамкорликни йўлга қўйиш имкониятларини муҳокама қилиш билан бир қаторда ўзаро ҳамкорликнинг иккала томонга ҳам маъқул ва мос механизмлари, хусусан, Ўзбекистонда инглиз тилини ўқитиш тизимини модернизация қилишни ўрганиш каби қўшма лойиҳаларни амалга ошириш юзасидан фикр алмашди.
Буюк Британия вакиллари мамлакатимизда «TESOL» (Бошқа хорижий тилларда сўзлашувчилар учун инглиз тилини ўқитиш) лицензиясига эга тестларни жорий этиш, инглиз тили ўқитувчиларининг касб малакасини ошириш, Хорижий тилларни ўрганишни оммалаштириш агентлиги ҳузуридаги телерадиоэшиттириш ва журналистика марказига эга «Foreign Languages» телеканали билан NTU қошидаги «Notts TV» телеканали ўртасида халқаро журналистика йўналишида кадрлар тайёрлаш бўйича ҳамкорликни йўлга қўйишга тайёрлигини билдирди.
Бундан ташқари, томонлар ўзаро ташрифлар, хусусан, ноябрь ойининг якунида Ўзбекистонга NTU таълим делегациясининг ташрифини ташкил этиш бўйича келишиб олди, деб хабар беради «Дунё» АА.
Маълумот ўрнида, 1843 йилда асос солинган Nottingham Trent University университети Буюк Британияда катталиги жиҳатидан олтинчи ўринда туради (бу ерда 35 мингдан ортиқ талаба таҳсил олади). 2017 ва 2019 йилларда мазкур олий билим юрти мамлакатда «Йил университети» деб топилган. NTU жаҳон университетларининг «QS World University Rankings» рейтингида 105-ўринда, Европанинг энг яхши университетлари қаторида эса 20-поғонада қайд этилган.
