Мамлакатимизнинг ушбу нуфузли халқаро ташкилот билан ҳамкорлигини янада кенгайтириш, Барқарор ривожланиш мақсадларига эришиш, инсон ҳуқуқларини ҳимоя қилиш ва гендер тенгликни таъминлаш, ёшларни қўллаб-қувватлаш бўйича устувор йўналишларда амалий ва конструктив мулоқотни давом эттириш каби масалалар муҳокама этилди.
Шунингдек, ПИ билан биргаликда ўтказиладиган тадбирлар, хусусан 2025 йил юртимизда бўлиб ўтадиган 150-юбилей Ассамблеяга тайёргарлик кўриш ва унинг доирасидаги тадбирларни ўтказишнинг ташкилий жиҳатлари кўриб чиқилди.
Мартин Чунгонг таъкидлаганидек, бўлажак Ассамблеянинг асосий мавзуси Ўзбекистон томонининг устувор йўналишлари ва таклифларидан келиб чиқиб белгиланади.
— Тошкент саммити нафақат ПИ, балки бутун жаҳон парламент ҳаракати учун тарихий аҳамиятга эга бўлади. Унинг доирасида қабул қилинган қарорлар ташкилотимизнинг ўрта ва узоқ муддатли истиқболдаги ривожланиш йўналишларини белгилайди — деди, Мартин Чунгонг.
Мулоқот чоғида жорий йил май ойида Самарқандда ўтказиладиган Осиё хотин-қизлар форуми дастуридан махсус парламент сегменти ўрин олгани таъкидланиб, уни муваффақиятли ўтказилишида ПИнинг кўмагига умид билдирилди, деб хабар беради Олий Мажлис Сенати матбуот хизмати.