Жорий йил февраль ойида «Ўзбекнефтгаз» АЖ ишчи гуруҳи «SDK GROUP AND» МЧЖ ҚК билан тизим корхона ва бошқармалар учун импортдан ҳарид қилинаётган турли хилдаги фильтр ва мойларни ўзлаштириш бўйича келишувлар олиб борган эди.
Ушбу келишувлар асосида «SDK GROUP AND» МЧЖ ҚК томонидан ишлаб чиқарилган 3 дона ҳаво фильтри тажриба синовидан ўтказиш мақсадида «Ўзбекнефтгаз» АЖ Муборак нефть ва газ қазиб чиқариш бошқармасига қарашли азотли компрессор қурилмасига ўрнатилди. 72 соат давом этган саноат синовларида қурилмада ҳеч қандай салбий ўзгаришлар аниқланмади.
Тажриба синов ишлари ижобий якунланиб, натижаси бўйича мутахассислар томонидан далолатнома расмийлаштирилди. Келгусида ҳаво фильтрларини сотиб олишда биринчи навбатда маҳаллий ишлаб чиқарувчи таклифларини кўриб чиқиш белгилаб олинди, деб хабар беради «Ўзбекнефтгаз» АЖ матбуот хизмати.
