“Йиғилишда 2025 йил 13 март куни Бишкек шаҳрида имзоланган “Қирғизистон Республикаси ва Тожикистон Республикаси ўртасида Қирғизистон-Тожикистон давлат чегараси тўғрисидаги шартномани ратификация қилиш тўғрисида”ги қонун лойиҳаси уч ўқишда кўриб чиқилиб, қабул қилинди”, дейилади хабарда.

Таъкидланишича, депутатлар Душанбе билан йўллар қуриш ва улардан фойдаланиш тўғрисидаги шартномани ҳамда сув хўжалиги ва энергетика объектларидан фойдаланишни таъминлаш бўйича шартномани ҳам ратификация қилган.

Қирғизистон ва Тожикистон ўртасидаги минг километр узунликдаги чегара вақти-вақти билан маҳаллий аҳоли ва икки давлат чегарачилари ўртасидаги жиддий можаролар ҳудудига айланиб қолганди. Бунга Тожикистоннинг Сўғд вилояти ва Қирғизистоннинг Боткен вилояти ўртасидаги делимитация қилинмаган ҳудудлар сабаб бўлган. 2025 йилнинг февралида Бишкекдаги музокаралардан сўнг Қирғизистон ва Тожикистон делегациялари делимитация бўйича якуний баённомани имзолашди. Эмомали Раҳмоннинг 13 март куни Қирғизистонга давлат ташрифи чоғида давлат чегараси тўғрисидаги битим Президентлар томонидан имзоланганди, деб хабар беради ria.ru.