3 ноябрь куни эрталаб Рим марказида Колизей ва Рим форумидан бир неча қадам нарида жойлашган ўрта асрга оид Конти минораси (Torre dei Conti) қисман қулаб тушди.
Қулаш тиклаш ишлари пайтида содир бўлди: қутқарувчиларнинг сўзларига кўра, аввал иншоотнинг бир қисми қулаб тушди, тахминан бир соатдан кейин, жабрланувчиларни қидириш ишлари олиб борилаётган пайтда, иккинчи қисми ҳам қулади. Тўрт ишчи вайроналар остида қолиб кетди. Улардан бири, Руминия фуқароси, атиги 11 соатдан кейин қутқарилди, аммо у шифохонада ҳаётдан кўз юмди. Бир ишчи бошидан оғир жароҳат олди, яна икки киши лат еган. Кейинги қулаш хавфи туфайли минора атрофидаги ҳудуд ўраб олинган.
Конти минораси 1203 йилда папа Иннокентий IIIга тегишли бўлган қудратли Конти ди Сеньи Рим оиласи томонидан қурилган. У бир вақтлар 50-60 метр баландликка етган ва Римдаги бошқа аристократ оилалар билан рақобатлашадиган оила учун мустаҳкам турар жой бўлиб хизмат қилган. XIV ва XVII асрлардаги вайронкор зилзилалардан сўнг, минора бир неча бор таъмирланган, аммо баландлигининг катта қисмини йўқотган ва ҳозирда атиги 29 метрни ташкил этади. Сўнгги йилларда иншоот қайта тикланмоқда, чунки унинг ғишт деворлари ва ички таянчларини мустаҳкамлаш зарурати туғилди.
Бу воқеа Италия расмийлари учун огоҳлантириш бўлди: шаҳарнинг тарихий марказидаги энг қадимги ёдгорликлардан бирининг қулаши яна бир бор қадимий биноларнинг ҳолати ҳақида саволлар туғдирди, уларнинг тузилмалари вақт, зилзилалар ва шаҳар транспортининг тебранишлари туфайли заифлашган. Расмийлар яқин келажакда Рим марказидаги барча таъмирлаш жойларида, хусусан, Колизей ва Форумлар атрофидаги ҳудудда хавфсизлик текширувини ўтказиш ниятида, деб хабар берди vesti.kg.
