«Бу нима деган гап?! Инсон қадри шуми? Тошкентда, ёзда салқин, қишда иссиқ кабинетларда ўтирган амалдорлар болалари қишлоқнинг лой йўлларида ҳар куни 10 километрлаб юришига, аҳоли уйларида ўқишига рози бўлишармиди? Яна уйларда таълим бераётган ўқитувчиларга маош ҳам берилмаяпти экан. Ўқитувчининг нима айби бор бу ерда?!», – дея эътироз билдирди Сардор Умурзаков.

Йиғилишда барча масъуллар, жумладан Халқ таълими вазири Б.Саидов, Сурхондарё вилояти ҳокими Т.Боболов ҳамда Шўрчи тумани ҳокими Б.Худойберганов вазиятга изоҳ берар экан, мазкур ҳолатлар ўз тасдиғини топганини тан олишди. Айтилишича, ушбу ҳолат юзасидан ишчи гуруҳ тузилиб, зудлик билан Шўрчи туманига юборилган.

Шўрчи тумани ҳокими Б.Худойберганов ўқувчиларга аҳоли уйларида дарс берилаётганидан хабарсиз қолганини, бу ташаббус ўзбошимчалик билан ёшлар масалалари бўйича ҳоким ўринбосари ва туман халқ таълими бўлими бошлиғи томонидан ташкил қилинганини маълум қилди.

“Юзлаб болалар сарсон бўлиб юрсаю, ҳокимлик вакиллари бунга бефарқ қараса, шуми давлат раҳбари билдирган ишончга муносабат?! Демак, ишига масъулиятсизлик билан қараган туман ҳокими ўринбосари ва халқ таълими бўлими мудири ишдан олинсин ва уларнинг фаолиятига ҳуқуқий баҳо бериш керак. Туман ҳокими Бахтиёр Худойбергановга эса ҳайфсан берилсин. Агар зудлик билан вазият ўзгармаса, ҳокимият биноси бўшатилиб, болалар шу бинода таълим олишади. Мен мутлақо жиддий айтяпман. Ҳоким уйида ташкил қилаверсин ишини», - деди Администрация раҳбари.

Шунингдек, Сардор Умурзаков Шўрчи воқеаси ҳар бир вилоят ва ҳар бир туман ҳокимлигига ўрнак бўлиши кераклиги, Халқ таълими вазирлиги билан бирга комиссия тузилиб, ташкил этилиши режалаштирилган 168 та ихтисослаштирилган мактаб хатловдан ўтказилиши, ҳар бир мактаб бўйича керак бўлса ўқитувчи ва ўқувчилар кесимида аниқ ахборот киритиш бўйича мутасаддиларга топшириқ берди.