Ўзбекистонлик спортчи ўқ отиш бўйича Осиё чемпионатида кумуш медалтини қўлга киритди. Бу ҳақида Миллий олимпия қўмитаси хабар берди.
Корея Республикасининг Тегу шаҳрида ўқ отиш спорти бўйича қитъа биринчилиги давом этмоқда. Бугунги кун баҳслари иштирок этаётган Ўзбекистон терма жамоаси учун муваффақиятли ўтди.
Ёшлар ўртасида 10 метрга пневматик тўппончадан отиш баҳсларида Вениамин Никитин мамлакат шарафини муносиб ҳимоя қилди. Никитин саралашда кучли 8 ликка кириб, медаллар учун курашни давом эттирди.
Ҳал қилувчи паллада эса ҳиндистонлик Сандип Бишнои билан чемпионлик учун рақобатлашди. Якунда омад Ҳиндистон вакили томонида бўлди ва Никитин кумуш медаль билан тақдирланди.
