Экологик назорат инспекцияси ходимлари Чирчиқ дарёси ҳудудида навбатдаги назорат рейд тадбирларини ўтказди.
Рейд давомида фуқаро А.Қ. дарёдан 1 дона «Volvo» русумли экскаватор ҳамда ҲОWО русумли юк транспорт воситаси ёрдамида табиий қум-шағал қазилиб, «С.Қ.М» МЧЖ тош майдалаш цехига ташиб олиб кетилаётгани аниқланди.
Натижада «Табиатни муҳофаза қилиш тўғрисида»ги қонуннинг ҳамда «Ер ости бойликлари тўғрисида»ги қонуннинг талаблари бузилган.
Давлат инспекторлари томонидан транспорт воситалари ҳолатга ойдинлик киритилгунга қадар жарима майдонига қўйилган.
Юқоридаги қонунбузарлик натижасида табиатга 674 миллиард 048 миллион 699 минг 520 сўм миқдорида зарар етказилган.
Ҳолат юзасидан тўпланган ҳужжатлар ҳолатга ҳуқуқий баҳо бериш ва айбдорларга нисбатан қонуний чора кўриш мақсадида Бош прокуратурага юборилди.
