Украинанинг Донбасс минтақаси урушни тугатиш учун “бўлиниши” керак, унинг катта қисми Россия назорати остида қолиши керак. Бу ҳақда АҚШ Президенти Дональд Трамп 19 октябрь, якшанба куни Россия-Украина урушининг тугаши масаласидаги баёнотида айтди, деб хабар берди dw.com.
“Барчаси қандай бўлса шундай қолсин. У аллақачон бўлинган. Менимча, минтақанинг 78 фоизи аллақачон Россия томонидан банд қилинган”, деди Трамп Air Force One бортида журналистларга.
“Улар кейинроқ ўзаро нимагадир келишиб олишлари мумкин. Аммо ҳозирча можародаги ҳар икки томон ҳам фронт чизиғида тўхташлари керак – уйларига қайтишлари, жангларни тўхтатишлари, одамларни ўлдиришни бас қилишлари керак”, деди Оқ уй раҳбари.
Трамп Зеленскийни бутун Донбассдан воз кечишга чақирмади
Трамп 19 октябрь куни The Financial Timesдаги мақолани рад этди. Унда Украина етакчиси Владимир Зеленский билан учрашувда Америка Президенти уни бутун Донбассни Россияга топширишга ундагани ва акс ҳолда Россия Президенти Владимир Путин Украинани “йўқ қилишини” қўшимча қилган.
Трамп: Ҳиндистон Россиядан нефть сотиб олишни камайтирмаса, бож тўлашда давом этади
Журналистлар билан учрашувда Трамп Ҳиндистон ҳақида ҳам фикр билдирди ва Бош вазир Нарендра Моди Россия нефтини харид қилишни чеклашга ваъда берганини эслатди. Агар бу амалга ошмаса, Нью-Деҳли “катта божлар” тўлашда давом этади, дея қўшимча қилди АҚШ Президенти.
