NKY Architects and Engineers компанияси архитектура ва дизайн соҳасида етакчи компаниялардан биридир. Компания Туркияда ва хорижий мамлакатларда госпиталлар, университет кампуслари, аэропортлар ва бошқа объектларнинг дизайнини яратишда иштирок этган.
AKFA Университетининг концептуал дизайнини яратишда NKY Architects and Engineers мутахассислари таълим муассасаларининг биноларини яратишдаги тажрибаси, архитектура ва дизайн соҳасидаги охирги трендлардан фойдаланди.
Концептуал дизайн яратиш даврида талабалар, профессорлар, университет ходимлари ва меҳмонларига қулайликлар яратишга алоҳида эътибор қаратилди. Архитекторлар университет кампусининг хавфсизлигини таъминлаш масалаларига ҳам урғу беришди.
Университет кампуси Тошкент шаҳрида жойлашади. Кампус қурилиши учун 20 гектар ер участкаси харид қилинди.
Кампус ҳудуди бир неча кичик ҳудудларга бўлинади: таълим бинолари, турар жойлар, маъмурият, маданият, спорт ва клиника ҳудудлари шулар жумласидандир. Улар ҳалқа йўли ва хиёбонлар билан боғланади. Бу эса университет талабалари ва ходимларининг керакли бинога бир неча дақиқада етиб олишларига имконият яратади.
AKFA Университетининг кампуси 10 минг нафар талабага мўлжалланган. Кампус ҳудудида кутубхона, кафетерий, ётоқхона, спорт иншоотлари, лабораториялар, клиника ва бошқа объектлар жойлашади. Ётоқхона 3 минг кишига хизмат кўрсатади.
AKFA Университети бўлажак шифокорларни тайёрлайди. Уларнинг билим ва кўникмалар олишлари ҳамда амалиёт ўташлари учун инфратузилма керак. Кампусда талабалар назарий билимларини амалиётда мустаҳкамлашлари учун тренажёрлар хонаси ташкил этилади.
Олий таълим муассасаси маъмурияти 600 ўринга мўлжалланган клиника яратишни режалаштирган. Мазкур клиникада талабалар малакали шифокорлар билан ҳамкорликда касалларни қабул қилади ва уларга тиббий ёрдам кўрсатади.
— Университетнинг муваффақиятли фаолият юритиши учун керакли моддий-техник база яратиш керак. Биз ўзимизнинг кампусни яратиш учун илк қадамимизни қўйдик. Кампус очилганидан кейин ёшларга таълим олишлари учун керакли шароит яратиш мақсадида янги факультетлар ташкил этишни режалаштирганмиз, — деди AKFA Университети ректори Беҳзод Жалилов.
Шуни таъкидлаш лозимки, AKFA Университети кампусини қуриш бўйича лойиҳани бир неча босқичда амалга ошириш режалаштирилган. Лойиҳанинг биринчи босқичи 2021-йилда якунланиши кутилмоқда.
