Соат 17:00 да Учқудуқ тумани ҳудудидан ўтган А-379 йўлининг 282 километрида «Учқудуқ- Навоий» йўналиши бўйлаб ҳаракатланиб кетаётган «Lacetti» русумли автомашина қарама-қарши йўналишга чиқиб кетиши оқибатида ушбу йўналишда ҳаракатланиб келаётган «Nexia» русумли автомашина билан тўқнашиб, йўл- транспорт ҳодисасини содир этган.
Натижада «Nexia» автомашинасида бўлган 26 ёшли ва 57 ёшли йўловчилар (уларнинг ҳар иккаласи ҳам аёл киши) ҳодиса жойида вафот этган. Яна 3 нафар йўловчи турли даражадаги тан жароҳатлари билан тиббиёт муассасасига ётқизилган.
Мазкур ҳолат юзасидан Навоий вилояти ИИБ ҳузуридаги Тергов бошқармаси томонидан Ўзбекистон Республикаси Жиноят кодексининг 266-модда 3-қисми «а» банди (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Ҳозирда тергов ҳаракатлари олиб борилмоқда, деб хабар беради Ўзбекистон Республикаси ИИВ ҳузуридаги Тергов департаменти.
