Мазкур ҳужжатда қайд этилганидек, Бутунжаҳон туркий тиллар куни эълон қилиниши ЮНЕСКОнинг тил ва маданий хилма-хиллик, минтақавий ва глобал ҳамкорлик, туркий халқлар оғзаки меросини сақлаб қолиш ва ғояларини ривожлантириш борасидаги устуворликларини амалга оширишга ёрдам беради.

Кун тартибига туркий тиллар ҳақидаги банд Озарбайжон, Қозоғистон, Қирғизистон, Туркия ва Ўзбекистон томонидан ҳамда ЮНЕСКОга аъзо 21 та давлат қўллаб-қувватлаши орқали киритилган эди. Бу сананинг танланиши тасодиф эмас: 1893 йил 15 декабрда даниялик олим Вильгельм Томсен туркий тилларнинг кўп асрлик тарихини тасдиқловчи қадимий ёзма манбалардан бири, хусусан, озарбайжон, ўзбек, қозоқ, қирғиз, турк, туркман тиллари мансуб туркий тиллар оиласи келиб чиқишига гувоҳлик берувчи Ўрхун битиклари алифбосини ўқишга муваффақ бўлганини эълон қилганди.

Бутунжаҳон туркий тиллари куни доирасида кўргазма, маъруза, адабий кеча, бадиий томоша каби турли маданий тақдимот ҳамда тадбирлар бўлиб ўтади. Шу орқали туркий тилли давлатларнинг маданий хилма-хиллиги объекти сифатида уларнинг маданий ва ижтимоий қимматини намойиш қилинади. Шунингдек, туркий тиллар оиласининг инсоният тараққиётига қўшган ҳиссаси ҳақида хабардорликни оширади.

Туркий тиллар ЮНЕСКОга аъзо ва 12 миллион квадрат километр майдонда истиқомат қиладиган 200 миллиондан зиёд аҳолининг она тили саналади.