Яман ҳудудининг қарийб учдан бир қисмини назорат қилувчи “Ансор Аллоҳ” исёнчи ҳаракатининг бир қисми бўлган ҳусийлар пойтахт Санада БМТнинг 20 нафар ходимини, жумладан, 15 нафар чет эл фуқаросини ҳибсга олди. Бу ҳақда БМТ вакили ТАСС агентлигига маълум қилди.
“Кеча, 2025 йил 18 октябрь куни “Ансор Аллоҳ” хавфсизлик хизмати ходимлари БМТнинг Санадаги қароргоҳига рухсатсиз киришган. Охирги маълумотларга кўра, 11 нафар миллий ходим сўроқдан кейин қўйиб юборилган. Беш нафар миллий ходим ва 15 нафар халқаро ходим қароргоҳда ҳибсда қолмоқда”, деди агентлик матбуот котиби.
Матбуот котибининг қўшимча қилишича, БМТ “ушбу жиддий ҳодисани имкон қадар тезроқ ҳал қилиш, барча ҳибсга олинган ходимларни озод қилиш ва унинг объектлари устидан тўлиқ назоратни тиклаш учун” Сана расмийлари, шунингдек, халқаро тан олинган Яман ҳукумати билан алоқани давом эттирмоқда.
Al Arabiya хабарига кўра, сўнгги кунларда Ҳусийларнинг Яман пойтахтида халқаро ташкилотларга ҳужумлари кучайган. БМТ манбасига кўра, сўнгги кескинлик тўлқини исёнчилар етакчиси Абдел Малик ал-Ҳусийнинг Яманда фаолият юритаётган гуманитар ташкилотлар билан боғлиқ бўлган “хавфли жосуслик ячейкалари” мавжудлиги ҳақидаги сўнгги баёнотидан кейин бошланган.
Ўзининг тарафдорларига қилган сўнгги мурожаатида ал-Ҳусий БМТ Жаҳон озиқ-овқат дастури ходимларининг Исроилга 2025 йил августида Санадаги ҳужумларга ёрдам берган разведка маълумотларини тақдим этишда иштирок этгани ҳақида “инкор этиб бўлмас далиллар” борлигини даъво қилди. Ушбу ҳужумларда ҳаракатнинг бир қанча юқори мартабали аъзолари, жумладан, ҳусийлар томонидан тузилган ҳукумат раҳбари ва исёнчилар штаб бошлиғи ҳалок бўлди.
Яманда фаолият юритаётган БМТ агентликлари ва гуманитар ташкилотларга қарши ҳусийларнинг риторикаси сўнгги ойларда Исроилнинг исёнчилар нишонларига берган зарбалари фонида кескин авж олди. Октябрь ойи бошида ҳусийлар БМТнинг тўққиз нафар ходимини ҳибсга олган ва уларни жосусликда айблаган эди. БМТ Бош котиби матбуот котиби Стефан Дюжаррикнинг сўзларига кўра, 2021 йилдан бери ҳусийлар назоратидаги ҳудудда БМТнинг жами 53 нафар ходими ҳибсга олинган, деб хабар берди tass.ru.
