Ҳужжат ноябрь ойида Хавфсизлик Кенгашига раислик қилувчи Сьерра-Леоненинг БМТдаги доимий миссияси матбуот хизмати томонидан тарқатилган.
Қўшма хатда “афсус билан” таъкидланишича, жаҳон ташкилоти тарихида ҳеч қачон аёл унинг раҳбари этиб тайинланмаган ва шунинг учун “аъзо давлатлар аёлларни номзод сифатида кўрсатишни жиддий кўриб чиқишга чақирилади”.
Ҳужжатда шунингдек, “Биз Бош котибни танлашда минтақавий хилма-хилликнинг муҳимлигини таъкидлаймиз”, дейилади.
БМТ Бош котиби лавозимига номзод аъзо давлатлар томонидан кўрсатилади, ҳар бир мамлакат биттадан ортиқ номзодни таклиф қилиш ҳуқуқига эга эмас. Номзодни кўрсатиш учун мамлакатлар Хавфсизлик Кенгаши ва Бош Ассамблея президентларига хат топширишлари керак. Номзодлар, ўз навбатида, ташкилотни ривожлантириш бўйича ўз қарашларини, шунингдек, даромад манбаларини тақдим этишлари керак. Агар номзод БМТ агентлигида ишласа, хатда улар “манфаатлар тўқнашувининг олдини олиш учун сайлов кампанияси давомида БМТдаги ишини тўхтатиб туришни кўриб чиқишлари” кераклиги айтилган.
Бош котибни сайлаш келаси йилнинг июль ойи охирига режалаштирилган. Ҳозирда икки киши жаҳон ташкилоти раҳбари лавозимига номзод бўлиш истагини билдиришди: Халқаро атом энергияси агентлиги раҳбари Рафаэль Гросси ва БМТнинг Савдо ва ривожланиш бўйича конференцияси бош котиби Ребекка Гринспан.
Амалдаги БМТ Бош котиби Антониу Гутерришнинг ваколат муддати 2026 йил 31 декабрда тугайди, деб хабар берди report.az.
