Пенсия жамғармаси мазкур ҳолатлар бўйича аҳолини огоҳлантириб, эҳтиёткор бўлишга чақирди.
Маълум қилинишича, пенсия миқдорини ошириш фақат Пенсия жамғармасининг туман (шаҳар) бўлимлари томонидан амалга оширилади. Фуқароларда пенсиясини қайта ҳисоблаш учун асослар мавжуд бўлса, улар фақат расмий бўлимларга мурожаат қилишлари мумкин.
“Пенсия жамғармасининг ҳеч бир ходими фуқароларга кўчада пенсия миқдорини ошириб беришни таклиф қилмайди. Бегона шахсларга паспорт, пластик карта ёки ЖШШИР (PINFL) рақами каби шахсий маълумотларингизни ҳеч қачон тақдим қилманг”, дейилади расмий хабарда.
Пенсия жамғармаси шу каби шубҳали ҳолатларга дуч келган фуқаролардан жамғарманинг ишонч телефони (1271) Ички ишлар органларига (102) хабар беришни сўради. Фирибгарларга алданишдан эҳтиёт бўлишга чақирди.
