Россиянинг ижтимоий тармоқларида, Тюменлик 14 ёшли мактаб ўқувчиси Hamster Kombat ўйини туфайли руҳий касалхонага ётқизилди. У кўпроқ танга топиш илинжида ҳар уч соатда уйғониб ўйинни давом эттиргани ҳақида хабарлар тарқалди.
Хабарда айтилишича, ўйинни меъёридан ортиқ ўйнаши ортидан болада уйқусизлик касаллиги ривожланган. Бу эса боланинг руҳий зўриқишига ва бошқа касалликларнинг ривожланишига олиб келган.
Ҳолат бўйича вилоят соғлиқни сақлаш бошқармаси изоҳ бера олмаслигини билдирди, дейилади хабарда.
Шуни алоҳида айтиб ўтиш керакки, Hamster Kombatʻнинг асосий механикаси оддий. Ўйинчилар қанча танга олишни хоҳласа шунча Hamstert тасвирига тегиниши керак бўлади. Қанча кўп босилса, шунча кўп танга йиғилади.
Бу эса ўйинчиларни фаол бўлишга ундайдиган оддий динамикадир. Бироқ ўйиннинг функционаллиги фақат Hamstertʻга тегиниш билан чекланмайди. Кўпроқ танга тўплаш учун кунлик амалларни бажариш ва совғаларни очиб бориш керак бўлади.
Маълумот ўрнида: Hamster Kombat ўйинчилар учун катта пул ютуқларини ваъда қилади. Одамнинг хаёлида қанча ўйнасам шунча пул топаман деган фикр шаклланади. Ана шу фикр кўплаб ёш болаларнинг уйқусизлик ва руҳий касалликларни орттириб олишига сабаб бўлиши мумкин.
