Ҳукуматнинг тегишли қарори билан юртимизда 24-25 август (шанба ва якшанба) кунлари Мустақиллик байрами арафасида умумхалқ хайрия ҳашари бўлиб ўтади.
Бу ҳақда Ўзбекистон маҳаллалар уюшмаси хабар берди.
Ушбу умумхалқ хайрия ҳашари маҳаллалар, аҳоли турар жойлари, хиёбонлар, истироҳат боғлари, зиёратгоҳлар, қабристонлар ва бошқа жойларни ободонлаштириш мақсадида ташкил этилмоқда.
Бундан ташқари, шу кунлари аҳолининг ижтимоий ҳимояга муҳтож қатламларига турли ёрдамлар кўрсатилади.
Бугун бутун мамлакатимиз бўйлаб энг чекка ва олис ҳудудларда “Обод хонадон – обод кўча – обод маҳалла” дастурларини жорий этиш мақсадида кенг кўламли бунёдкорлик ва ободонлаштириш ишлари олиб бориляпти.
Мамлакатимизда “Обод қишлоқ”, “Обод маҳалла” дастурлари доирасида бошланган юрт ободлиги, халқ фарофонлиги йўлидаги ҳаракатлар, хусусан, жойларда ички йўллар, ичимлик сув, электр энергияси ва газ таъминотини, таълим, соғлиқни сақлаш, маданият, спорт ва бошқа инфратузилма объектларини яхшилаш, шу асосда аҳоли учун муносиб турмуш шароити яратиш борасидаги ишлар янги босқичга чиқди.
