Вилояти Фавқулодда вазиятлар бошқармасининг маълум қилишича, бугун, 5 сентябрь куни соат 12:05да Андижон туманида жойлашган автомобилларга суюлтирилган ва сиқилган газ тўлдириш шохобчаси ҳудудида ёнғин содир бўлаётгани тўғрисида бошқармага мурожаат келиб тушган.
Хабарда айтилишича, газ тўлдириш шохобчаси ҳудудида тахминан 5 тоннали ёқилғи сақлаш сиғимига эга «МАН» русумли ёқилғи ташувчи автомобили цистернасидан пропан суюлтирилган газни тўкиш вақтида технологик жараён бузилиши оқибатида ёнғин келиб чиққан.
Ёнғин-қутқарув бўлинмалари ҳодиса жойига соат 12:13 да етиб бориб, ёнғин соат 12:26 да ўраб олинган ҳамда 13:03 да тўлиқ бартараф этилган.
Фавқулодда вазиятлар бошқармаси берган маълумотларга кўра, мазкур ҳодиса оқибатида тан-жароҳати олганлар аниқланмаган.
