Бу ҳақда Гонконг махсус маъмурий ҳудуди раҳбари Жон Ли пайшанба, 27 ноябрь куни маҳаллий вақт билан эрталаб бўлиб ўтган матбуот анжуманида эълон қилди.

Чоршанба куни шаҳар шимолидаги Тай По туманида ёнғин тезда бамбук искала орқали тарқалиб, бир нечта кўп қаватли биноларни қамраб олди. Ёнғин хизмати маълумотларига кўра, Wang Fuk Court турар-жой мажмуасидаги саккизта бинодан камида бештаси аланга ичида қолди. Ҳалок бўлганлар орасида ёнғинни ўчириш пайтида ҳамкасблари билан алоқа вақтинча узилиб қолган ва кейинчалик куйган ҳолда топилган ўт ўчирувчи ҳам бор эди.

Расмийлар ёнғинни энг юқори хавфлилик даражаси бўлган 5-даража деб таснифлашди. Гонконгда охирги марта 5-даража деб таснифланган ёнғин 2008 йилда содир бўлган.

Ёнғин хизмати бошлиғи ўринбосарининг сўзларига кўра, шамол ва учиб кетган қолдиқлар туфайли ёнғин жуда тез тарқалди. Ёнғиннинг расмий сабаби ҳали аниқланмаган. South China Morning Post газетасининг хабар беришича, маҳаллий аҳоли илгари ишчилар иш пайтида чекканидан шикоят қилишган.

Ёнғин билан боғлиқ ҳолда уч киши бехосдан одам ўлдиришда гумон қилиниб ҳибсга олинди.

Гонконгда ёнғин хавфсизлигини кучайтириш

Гонконг дунёдаги энг баланд ва энг зич жойлашган турар-жой биноларга эга бўлган шаҳарлардан бири. Шаҳарда ҳалокатли ёнғинлар илгари, айниқса камбағал ҳудудларда кўп учрар эди, аммо сўнгги ўн йилликларда хавфсизлик чоралари сезиларли даражада кучайтирилди ва Гонконгнинг турар-жой ҳудудларида йирик ёнғинлар энди анча кам учрайди, деб хабар берди dw.com.