Австралия Франция ва Буюк Британиядан кейин Россияга қарши мудофаа уруши олиб бораётган Украинага тинчликпарвар кучларини юбориши мумкин. Австралиялик тинчликпарвар кучларнинг халқаро миссияда иштирок этиш имконияти ҳозирда муҳокама қилинмоқда, деди Австралия Бош вазири Энтони Альбанезе. Канберра “ҳар қандай таклифларни кўриб чиқишга очиқ”, дея қўшимча қилди у.
“Австралия кўплаб минтақаларда, жумладан Африка, Кипр ва бир қатор тинчликпарвар ҳудудларда катта роль ўйнаган”, деди Альбанезе, “Биз Украинада тинчлик ўрнатилишини истаймиз, лекин биз Россиянинг қонунга хилоф ва ахлоқсиз ҳаракатлари мукофотланмаслигига, на Владимир Путин, на унинг империалистик режалари мукофотланмаслигига ва рағбатлантирилмаслигига ишонч ҳосил қилмоқчимиз”.
Австралия НАТО аъзоси эмас, балки альянснинг глобал ҳамкорларидан биридир.
Австралия Бош вазирининг баёноти АҚШ Президенти Дональд Трамп Украинага берилаётган барча ҳарбий ёрдамни музлатиш ҳақида буйруқ берганидан кейин янгради. Трампнинг фармонига кўра, Америка ёрдамини кўрсатишдаги “танаффус” Украина раҳбарияти “тинчлик тарафдори” эканини намойиш қилмагунча давом этади, деб хабар беради dw.com.
