Бугун мамлакатимизда инсон қадри улуғланиб, адолат ва очиқлик тамойилларига таянган жамият барпо этилмоқда. Конституциямизнинг янги таҳрири эса бу ўзгаришларнинг ҳуқуқий пойдеворини мустаҳкамлаб, давлат ва жамият ҳаётида янги саҳифа очди.
Ёруғ кунларга интилиб яшаган авлод учун мустақиллик ҳам ғурур, ҳам масъулият. Эзгу меҳнат, ҳар бир орзу, ҳар қандай фидойилик бу неъматнинг асосига қўйилган пойдевордир.
Кейинги йилларда “Янги Ўзбекистон” тушунчаси халқимиз қалбидан мустаҳкам ўрин олди. Чунки у орқали ўтмиш хатоларидан сабоқ чиқарган, мажбурий меҳнатдан холи бўлган, инсон қадрини улуғлайдиган, адолатли ва очиқ жамият қураётган давлат намоён бўлмоқда.
Янги Ўзбекистон дунёга очиқ, қўшниси билан тинчликни устун деб билган, иқтисодий дипломатия билан янги бозорлар очаётган, имкониятга тўла замин. Шунингдек, у ўзгалар ёрдамини бир томонлама эмас, ўзаро манфаат асосида қўллаётган юксак маданият ва ҳақиқий дўстлик ҳиссига эга давлатга айланди.
Юртимизга, давлатимиз раҳбарига билдирилаётган юксак ҳурмат ва эътироф дунёда ўрнимиз мустаҳкамланиб бораётганининг ёрқин исботидир. Бугун Ўзбекистон нафақат сиёсий ва иқтисодий майдонда, балки инсон қадрини юксалтиришда ҳам ўрнак бўлаётган давлат сифатида танилмоқда. Давлат билан давлат, халқ билан халқ ўртасидаги юракдан чиққан самимий муносабатлар айнан шундан далолат беради.
Халқимизнинг ишончи ва муҳаббати — энг олий мукофот. Ана шу ишонч бошланган ҳар бир ишга куч, ҳар бир қадамга руҳ, ҳар бир саъй-ҳаракатга барака бағишламоқда.
Сўнгги йиллардаги кенг кўламли ислоҳотлар Ўзбекистон Конституциясининг янги таҳририда мустаҳкамланди. Бош қомусимиз инсон қадрини юксалтириш тамойилини давлат сиёсатининг марказига қўйди. Ижтимоий давлат тамойилларини янада мустаҳкамлади. Фуқароларнинг ҳуқуқ ва эркинликларини замон талабларига мос равишда кенгайтирди. Халқ билан мулоқот, адолатли суд тизими ва очиқ бошқарув тамойилларини конституциявий кафолатлади.
Буларнинг барчаси Ўзбекистоннинг янги тараққиёт босқичи — “инсон қадри учун” тамойилига асосланган давлат бошқаруви моделига ўтгани исботидир. Конституциямиз эса айнан шу ишончни мустаҳкамлаш, давлат ва жамият муносабатларини янада самарали қилиш йўлида ҳуқуқий асос вазифасини бажаради.
Янги Ўзбекистон Конституцияси — оддий ҳужжат эмас. Бу халқнинг тарихий хотираси, бугунги ишончи ва эртанги кунига қатъий қадами, миллатнинг ўз келажагини ўзи яратиш йўлидаги буюк мақсади рамзидир.
Баҳодиржон
ШЕРМУҲАММАДОВ,
Фарғона давлат
университети ректори
