Россияга қарши Европа санкциялар режимига қўшилиш Сербиянинг Европа Иттифоқига қўшилишининг мажбурий шартидир. Европарламент бу резолюцияни 22 октябрь, чоршанба куни маъқуллади. 720 аъзодан 457 нафари ёқлаб, 103 нафари қарши, 72 нафари эса бетараф овоз берди. Европарламент резолюциялари сиёсий позицияни ифодалайди ва Европа Иттифоқининг бошқа институтларига чақирув бўлиб, бироқ мажбурий характерга эга эмас, деб хабар берди dw.com.
Европарламент Сербиядаги “Россияпараст ташвиқот”га қарши
Қарор Сербиянинг Нови-Сад шаҳрида 16 киши ҳалок бўлган фожианинг яқинлашиб келаётган санасига бағишланган. Фожиа ортидан бутун мамлакат бўйлаб минглаб одамлар норозилик намойишларига чиқди. Европарламент намойишчиларнинг намойиш қилиш ҳуқуқини қўллаб-қувватлади ва уларни тарқатиб юборган ҳукуматни қоралади.
Европарламент депутатлари, шунингдек, Сербияда “ҳукумат назоратидаги оммавий ахборот воситалари ва расмийлар” томонидан олиб борилаётган “аксилевропа ва россияпараст ташвиқот”га ишора қилишди. Резолюция Сербияда эркин ва адолатли сайловлар ўтказилишини талаб қилади.
Европарламент Сербиянинг Европа Иттифоқига қўшилишини қўллаб-қувватлайди, бироқ санкциялар шарти билан
“Парламент демократия, қонун устуворлиги ва асосий ҳуқуқлар соҳасида сезиларли ютуқларга эришган ҳолда, шунингдек, Европа Иттифоқининг умумий ташқи ва хавфсизлик сиёсати ва Россияга қарши санкцияларига тўлиқ риоя қилганда Сербиянинг Европа Иттифоқига аъзо бўлиш истиқболларига қатъий содиқлигини таъкидлайди”, дейилади матнда.
ЕИ вакилларидан иборат делегация Сербияга “жойдаги вазиятни, жумладан, демократия ҳолатини баҳолаш учун” юборилади, дейилади резолюцияда.
Вучич: Хорватия Сербияда “рангли инқилоб” тайёрламоқда
Сербия расмийлари аввалроқ Россияга қарши санкциялар қўллаш ниятида эмаслигини бир неча бор таъкидлаган эди. Президент Александр Вучич 2025 йилнинг июль ва август ойларида ҳам худди шундай баёнотлар билан чиққан эди.
Европарламентнинг 22 октябрдаги резолюцияси ҳақида Вучич ТАНЮГ ахборот агентлигига у “патологик ёлғонларни” ўз ичига олганини айтди. Сиёсатчининг фикрича, ҳужжат ортида Сербияда “рангли инқилоб”га интилаётган Хорватия турган.
