Тадбирда барча 57 та иштирокчи давлатлар, мулоқот бўйича шерик давлатлар вакиллари ва ташкилотнинг ижро этувчи тузилмалари раҳбарлари иштирок этди.

Ўзбекистон Доимий вакили жорий йил 27 октябрда мамлакатимизда ўтган йирик сиёсий тадбир – Олий Мажлис Қонунчилик палатаси ва халқ депутатлари Кенгашларига сайлови натижалари тўғрисида йиғилиш қатнашчиларига батафсил сўзлаб берди.

Хусусан, давлатимиз тарихида биринчи маротаба парламент сайловлари аралаш сайлов тизими асосида ўтганлиги, сайлов комиссиялари фаолиятининг тўлиқ рақамлаштирилганлиги, овоз бериш жараёнларининг технологик инновациялар ва инклюзивлик таъминланган ҳолда ўтказилганлиги таъкидланди. Сайловлар Ўзбекистон Конституцияси, Сайлов кодекси ва халқаро стандартларга мувофиқ ташкил этилганлиги қайд этилди.

Шунингдек, кенг кўламли сайловни кузатиш миссияларини юборганлиги учун ЕХҲТнинг Демократик институтлар ва инсон ҳуқуқлари бўйича бюросига (ДИИҲБ) ва Парламент ассамблеяси котибиятига миннатдорлик билдирилди. ДИИҲБ билан конструктив ҳамкорликни давом эттиришдан Ўзбекистоннинг манфаатдор эканлиги ҳамда ЕХҲТ миссиясининг якуний ҳисоботи чиққанидан сўнг унда кўрсатилган тавсиялар тегишли тартибда кўриб чиқилиши маълум қилинди.

Тадбирда сўзга чиққан қатор хорижий давлатлар дипломатик ваколатхоналари раҳбарлари Ўзбекистон парламенти сайлови муваффақиятли ўтгани билан ўзбек томонини табриклади ва сайловларнинг очиқ, адолатли ҳамда демократик принципларга мувофиқ тарзда ташкил этилганини эътироф этди, деб хабар беради “Дунё” АА.