Тошкент вилояти “Ғишткўприк” чегара божхона пости орқали юртимизга кириб келган икки нафар фуқаро божхона кўригидан ўтказилганда божхона декларациясида кўрсатилмаган ва оғзаки сўровда маълум қилинмаган ҳайвон шохлари борлиги аниқланди.
Қайд этилишича, постга кириб келган автоуловнинг юк хонасида 600 дона ҳайвон шохлари бўлган.
Шунингдек, “Ғишткўприк” чегара божхона постига пиёда ҳолда кириб келган фуқаро ўзига тегишли бўлган қўл юклари божхона кўригидан ўтказилганида, 2 дона қопда оғзаки сўровда маълум қилинмаган ҳамда йўловчи божхона декларациясида ёзиб кўрсатилмаган 117 дона шохлар фош этилди.
Ўзбекистон Республикаси Фанлар академияси Зоология институти экспертиза хулосасига кўра аниқланган шохлар буғу турига мансублиги маълум бўлди.
Маълумот учун, буғулар Евросиёнинг мамлакатларида учрайди ва улар Ўзбекистон Республикасининг Қизил китоби рўйхатига киритилган.
Ҳозирда ҳолат юзасидан дастлабки суриштирув ҳаракатлари олиб борилмоқда.
