Яман ҳусий жангариларининг Либерия байроғи остидаги Eternity C грек юк ташувчи кемасига ҳужуми оқибатида тўрт нафар денгизчи ҳалок бўлди, яна 15 нафарини қидириш ишлари давом этмоқда. Бу ҳақда 9 июль, чоршанба куни Reuters агентлиги хабар берди.

Бу сўнгги бир неча кун ичида ушбу йўналишда чўкиб кетган иккинчи кемадир.

Қутқарув операциясида иштирок этган компаниялар маълумотларига кўра, Eternity C экипажи 25 кишидан иборат бўлган. Улардан тўрт нафари экипаж кемани тарк этгунга қадар ҳалок бўлган. Олти нафар денгизчи қутқарилди – улар сувда бир кундан ортиқ вақт ўтказишди. Қолганларини қидириш ишлари давом этмоқда.

Ҳусийлар 7 июль куни ҳужумни тасдиқлашди ва “Яман флоти” гўёки экипажнинг бир қисмига ёрдам кўрсатиб, уларни “хавфсиз жойга” етказганини айтди.

Кема икки марта денгиз кучларининг учувчисиз учоқлари, ракеталар ва тезюрар қайиқлар билан ҳужумга учраган, бу денгиз таҳлилчиларининг фикрича, ҳусийларнинг тактикасига хосдир. Қутқарув қайиқлари ўққа тутилган биринчи куниёқ йўқ қилинган.

Eternity C Греция компанияси Cosmoship Management томонидан фойдаланилган. Экипаж таркибида 21 нафар филиппинлик, бир нафар россиялик ва уч нафар қўриқчи бўлган.

Ҳусийлар 2023 йил кузидан бери Қизил денгиз минтақасидаги савдо ва ҳарбий кемаларга ҳужум қилиб, уларни Исроилни қўллаб-қувватлашда айблаб келади.

Аввалроқ Яман ҳусий гуруҳи Қизил денгизда юк ташувчи кемага ҳужум қилган эди. Ҳужум оқибатида кема жиддий шикастланганидан сўнг кема экипажи ўзини эвакуация қилишга муваффақ бўлди – кема ёниб кетди ва чўка бошлади, деб хабар беради korrespondent.net.