Ресторан ўзбек диаспорасининг фаол вакиллари томонидан Ўзбекистон элчихонаси кўмагида ташкил этилди.
Ўзбек миллий таомлари ресторани Лондоннинг энг машҳур ва гавжум ҳамда нуфузли кўчаларидан бири – шаҳар аҳолиси ва унинг меҳмонлари учун диққатга сазовор жой бўлган Пикадилли майдонида жойлашган.
Лондонга ҳар йили дунёнинг турли бурчакларидан 40 миллиондан ортиқ сайёҳ ташриф буюради. Сайёҳлар мамлакат иқтисодиётига қарийб 36 миллиард доллар фойда келтиради.
Янги тамаддихона Буюк Британия пойтахтидаги Ўзбекистоннинг ўзига хос рамзига айланиши кутилмоқда. Бу ерда меҳмонлар, шунингдек, энг яхши ўзбек дизайнерлари томонидан яратилган миллий услублар билан танишишлари мумкин. Унда кўплаб халқ амалий санъати намуналари, расмлар, миллий мусиқа асбоблари намойиш этилмоқда, улар шарқона таом муҳитини ҳам ўз ичига олган.
Ресторан ходимлари учун махсус тикилган кийимларда ўзбек миллий либослари элементлари киритилган. Менюдан эса палов, шўрва, манти, дўлма, қўзичоқ, товуқ ёки аралаш гўштдан тайёрланган ўнга яқин кабоблар ўрин олган.
- Гастрономиясиз мамлакат йўқ. Ўзбекистонда палов миллий таом ҳисобланади. Анъанага кўра, шифобахш хусусиятларга эга бўлган паловимиз махсус чўян қозонда баланд ва паст оловда бир неча соат давомида пишириладиган таомдир. Палов одатда мол ёки қўй гўшти, гуруч, нўхат ва сабзидан тайёрланади. Самарқанд, Фарғона, Тошкент, Қашқадарё, Бухоро ёки Хоразмда паловга турли хил сабзавотлар ва зираворлар ҳам қўшилади. Байрам ва кундалик палов рецептлари ҳам бор, - дейди ресторан асосчиси Музаффар Содиқов.
