Ушбу туризм фестивалида Малайзия, Индонезия, Туркия, Ҳиндистон, Сурия, Франция, Швейтсария, Португалия, Россия, Бангладеш ва бошқа давлатлардан 100 дан ортиқ дунёга машҳур олимлар, дин, фан ва жамоат арбоблари, шунингдек, туризм соҳаси вакиллари иштирок этмоқда.
Бугун фестиваль иштирокчилари Имом Ал-Бухорий ёдгорлик мажмуаси ва Имом Бухорий халқаро илмий-тадқиқот марказига ташриф буюришди. Бундан ташқари, Имом Ал-Мотуридий мақбараси, Хожа Аҳрор Валий масжиди, Шохи-Зинда мажмуаси ва Самарқанднинг бошқа диққатга сазовор жойларини зиёрат қилиш режалаштирилган.
Мазкур фестивални ўтказишдан асосий мақсад буюк ўзбек мутафаккирларининг ислом дини ва жаҳон цивилизацияси ривожидаги хизматларига ҳурмат бажо келтириш, муқаддас қадамжоларни зиёрат қилиш ва Зиёрат туризмининг бошқа объектлари билан танишишдан иборат.
