Пенсильвания университети олимлари оғиз ва томоқдаги вирусларни зарарсизлантиришга қодир ноёб сақич устида ишламоқда. Бу инфекциянинг олдини олишда янгилик бўлиши мумкин, деб хабар беради BILD.
Бу ғоя COVID-19 пандемияси даврида пайдо бўлган. Профессор Генри Дэниелл ва унинг жамоаси кўп миқдорда CTB-ACE2 оқсилини ишлаб чиқарадиган ўсимлик ҳужайралари асосида сақич ишлаб чиқишди. Бу оқсил вирусни организм ҳужайраларига ёпишиб олиш имкониятига эга бўлмасдан олдин блоклайди. Лаборатория шароитида бу сақич коронавирус концентрациясини 95 фоизга камайтирди.
Ҳозир олимлар грипп штаммлари ва герпес вирусига қарши курашда худди шу технологиядан фойдаланмоқда. Сақичнинг янги версияси ҳам лабораторияда истиқболли натижаларни кўрсатди ва яқин келажакда уни одамларда синаб кўриш режалаштирилмоқда, деб хабар беради korrespondent.net.
