Болалар омбудсманининг хабар беришича, Х.А (1991 йилда туғилган аёл) 2024 йил 30 октябрь куни 8 ёшли ўғли Б.А (2016 йилда туғилган) уйдаги ширинликларни рухсатсиз еганлиги сабабли уни гўёки жазолаш мақсадида бармоқлари ораси ва бошқа тана аъзоларига пахта тиқиб, ёққан.
Натижада бола танасида 1 ва 2-даражадаги куйиш юзага келиб, у енгил тан жароҳати олган. Шундан сўнг Олмалиқ шаҳар ИИБ томонидан Х.А га нисбатан ЖКнинг 110-моддаси (Қийнаш) 2-қисми «а» банди бўйича жиноят иши қўзғатилган ва яширингани туфайли унга қидирув эълон қилинган.
Маълумотларга кўра, шу йилнинг 7 февраль куни Х.А. процессуал тартибда ушланиб, унга тегишли суд ажрими асосида қамоқ эҳтиёт чораси қўлланилди.
Болалар омбудсмани мазкур ҳолат юзасидан бола манфаатлари нуқтаи назаридан ўз кузатувини давом эттиради.
Маълумот учун: Жиноят кодексининг 110-моддаси 2-қисми «а» бандида назарда тутилган жиноят учун 360 соатдан 480 соатгача мажбурий жамоат ишлари ёки 2 йилдан 3 йилгача ахлоқ тузатиш ишлари ёхуд 2 йилдан 5 йилгача озодликни чеклаш ёки 5 йилгача озодликдан маҳрум қилиш жазоси қўлланилади.
