Мулоқот чоғида Ўзбекистоннинг Жаҳон савдо ташкилотига аъзо бўлиш жараёнининг ҳолати ва истиқболлари хусусида фикр алмашилди.
Ўзбекистон томони Жаҳон савдо ташкилоти бош директорини ЖСТнинг 13-Вазирлар конференцияси (2024 йил 26 феврал – 2 март, Абу-Даби шаҳри) муваффақиятли ўтказилгани ва унинг доирасида кўп томонлама савдо тизимини мустаҳкамлаш бўйича эришилган муҳим келишувлар билан табриклади.
ЖСТ раҳбари Ўзбекистоннинг ташкилотга аъзо бўлиш борасидаги чора-тадбирларини юқори баҳолади. Таъкидланганидек, сўнгги пайтларда Ўзбекистон аъзо бўлиш жараёнидаги саъй-ҳаракатларини сезиларли даражада фаоллаштирди ва ЖСТга аъзо бўлиш устувор деб топилган давлатлар қаторидан жой олди.
Нгози Оконжо-Ивеала Ўзбекистон ЖСТнинг навбатдаги тўлақонли аъзоси бўлишига ишонч билдирди. Шу нуқтаи назардан, у ташкилот котибияти Ўзбекистон саъй-ҳаракатларини ҳар томонлама қўллаб-қувватлашини тасдиқлади.
Учрашув якунида ЖСТ бош директорининг жорий йил июнь ойида Ўзбекистонга ташрифига тайёргарликни бошлаш, Ўзбекистоннинг ЖСТга аъзо бўлиши бўйича ишчи гуруҳнинг 8-йиғилишини тезлаштириш, мутахассисларнинг малакасини ошириш ва қонунчиликни ЖСТ келишувлари ва қоидаларига мувофиқлаштиришга кўмаклашиш бўйича келишувга эришилди.
