Пастдарғом тумани «Камолот» маҳалласи аҳли бир неча ойдан буён кечаси тарқаладиган оғир ҳидли тутундан азият чекиб келаётгани ҳақида жамоатчиликка мурожаат қилган. Тумандаги мутасаддилар томонидан ўтказилган ўрганиш вақтида ҳаво ифлосланишига «Исмоил Захро» МЧЖнинг фаолияти сабаб экани аниқланган.
Маълумотларга кўра, корхона автомашина баллонларини ёқиб, чорва моллари учун емиш тайёрлаган. Ҳатто Самарқанд шаҳрининг «Супер» ҳудудига яқин жойдаги мазкур манзилдан шаҳар аҳолиси ҳам тушкунликка учраган.
Туман ҳокими ўринбосари Азиз Ғафуровнинг айтишича, тадбиркор узоқ вақт давомида 40 сотихли ёпиқ ҳудудга ишчи гуруҳларни киритмаган. 3 декабрь куни барча мутасадди идоралар қатнашган текширувда мазкур ҳудудда икки йилдан бери чўчқа боқилаётгани маълум бўлди.
Вилоят экология бошқармасига кўра, корхона чўчқа боқиш ва озуқа тайёрлаш фаолияти учун керакли экология ҳамда санитария-эпидемиология рухсатномаларини олмаган. Шунингдек, корхонанинг солиқ қарздорлиги 60 миллион сўмдан ошгани, расмий айланмаси эса 2024 йилда 400 минг, 2025 йилда 1 млн сўмни ташкил этгани қайд этилган.
Ҳокимлик ҳолат тезкорлик билан тўхтатилганини, жавобгар шахсларга нисбатан қонунчиликка мувофиқ чоралар кўрилишини маълум қилди.
