– Биз адолатли ва рақобатбардош тадбиркорлик фаолиятини жорий қиламиз. Бунда монополиянинг ҳар қандай кўринишига чек қўямиз. Хусусан, “УзАвтоМоторс” АЖга берилган имтиёзлар ва автомобиллар импортига белгиланган божхона тўловларини ҳар йили 15 фоиздан камайтириб очиқ рақобатга ўтишини, божхона тушумларининг камайиши эса тўланадиган солиқлар билан қопланишини таъминлаймиз.
Биз декларациялар топшириш тизимини янада такомиллаштириб ҳаётга чуқурроқ интеграция қилган ҳолда декларацияларни барча даромад олувчиларнинг топширишларига қаратилган сиёсатни олиб бориш билан биргаликда, ҳар бир инсоннинг катта миқдордаги харажатларини ҳам декларациялаш принципларини жорий қиламиз, – деди номзод Б.Абдуҳалимов.
Тадбирда бир гуруҳ партия фаоллари сўзга чиқиб, номзоднинг сайловолди дастурида ҳуқуқий-демократик давлат ва адолатли жамият қуришни изчил давом эттириш борасидаги таклифлар юзасидан ўз фикр-мулоҳазаларини билдирди ва сайловчиларни сайловда фаол иштирок этишга ҳамда ўзига муносиб деб билган номзодга овоз беришга чақирди.
Учрашувда номзод Баҳром Абдуҳалимов сайловчиларни қизиқтирган саволларига атрофлича жавоб берди.
