Учрашувда икки томонлама ҳамкорликни кенгайтириш масалалари муҳокама этилди. Жумладан, умумий қиймати 3,4 миллиард евро бўлган қўшма лойиҳаларни амалга ошириш масалалари кўриб чиқилди. Улар қаторида Сурхондарё вилоятида буғ-газ электр станциясини, “Навоиазот” акциядорлик жамияти негизида фотоэлектр ва иссиқлик электр станцияларини қуриш лойиҳалари ҳам бор.
Бундан ташқари, учрашувда рақамлаштириш, металлургия, электротехника, водород энергетикаси, нефть-газ саноатини ривожлантириш бўйича ҳамкорлик истиқболлари белгилаб олинди.
Музокаралар якунларига кўра, аниқ инвестиция лойиҳалари, уларни амалга ошириш бўйича босқичма-босқич механизмлари ва муддатларини ўз ичига олган қўшма “Йўл харитаси”ни тасдиқлашга келишилди, деб хабар беради Инвестициялар, саноат ва савдо вазирлиги матбуот хизмати.