Халқаро аҳамиятга эга М 39 “Тошкент-Термиз” автомобиль йўлининг “Тахти қорача” довонида йўл торлиги, хавфли бурилиш жойларининг радиуси кичиклиги, олдинда ҳаракатланиб кетаётган юк транспорт воситаларининг секин ҳаракатланиши туфайли қувиб ўтишнинг имкони йўқлиги ноқулайликлар туғдирмоқда.

Қашқадарё вилояти ҳокимлигининг билдиришича, шуни инобатга олган ҳолда автомобиль йўлининг 3-тоифадан 2-тоифага ўзгартиргунга қадар йўловчиларни ташиш учун мўлжалланган М2, М3 ҳамда Н3 тоифадаги транспорт воситаларининг ҳаракатланиши вақтинча чекланди.

Автотранспорт воситаларининг тегишли тоифалари бўйича изоҳ:

• М2 тоифаси — йўловчиларни ташиш учун фойдаланиладиган ва ҳайдовчининг ўриндиғидан ташқари ўриндиқлар сони 8 тадан ортиқ, энг катта вазни 5 тоннадан ортиқ бўлмаган автотранспорт воситалари;
• М3 тоифаси — йўловчиларни ташиш учун фойдаланиладиган ва ҳайдовчининг ўриндиғидан ташқари ўриндиқлар сони 8 тадан ортиқ, энг катта вазни 5 тоннадан ортиқ бўлган автотранспорт воситалари;
• N3 тоифаси — юк ташиш учун мўлжалланган, энг катта вазни 12 тоннадан ортиқ бўлган автотранспорт воситалари.