“Миллий” телеканалининг “Миллар” дастурида Тошкент шаҳри Олмазор туманидаги хусусий клиникада 31 ёшли эркак бурун операцияси вақтида вафот этгани ҳақида хабар берилди.

Марҳумнинг яқинларининг билдиришича, у нафас олишга қийналгани учун бурнини операция қилдиришга қарор қилган. Сўраб-суриштириб, бу амалиётни ижобий фикрлар билдирилган Қорақамиш даҳасидаги хусусий клиникада амалга оширадиган бўлган. Жарроҳлик операциясидан аввал тегишли текширувлардан ўтган. Шифокорлар операцияга рухсат берган.

Бироқ 12 ноябрь куни соат 11:30 ларда операцияга кириб кетган эркак кўп ўтмай вафот этган. Унинг ўлими ҳақида яқинларига 3 соат ўтиб хабар берилган.

Бош прокуратура матбуот хизматининг хабар беришича, 2025 йил 29 ноябрь куни хусусий клиника шифокорларига нисбатан Жиноят кодексининг 116-моддаси (Касб юзасидан ўз вазифаларини лозим даражада бажармаслик) билан жиноят иши қўзғатилди.

Олмазор тумани санитария-эпидемиологик осойишталик ва жамоат саломатлиги хизмати бўлимининг тегишли қарорига асосан хусусий клиника фаолияти расман тўхтатилган.

Тергов ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади.