Тухум энг кенг тарқалган озиқ-овқат маҳсулотларидан бири ҳисобланади. Унда микроорганизмларнинг кўпайиши учун қулай шароит мавжудлиги сабабли нотўғри сақлаш натижасида улар тез ривожланади.
Тухум амалдаги санитария қоида ва меъёрлари бўйича қуйидаги кўрсаткичларга текширилади:
- мезофил аэроб факультатив анаэроб микроорганизмларга
- ичак таёқчалари бактериялари гуруҳига (ИТБГ)
- патоген энтеробактерияларга
- Касалланган тухумни истеъмол қилиш натижасида одамларда озиқ-овқат маҳсулотлари орқали юқадиган касалликлар, хусусан, сальмонеллёз касаллиги юқиши мумкин.
Сальмонеллаларнинг ривожланиши учун энг қулай муҳит тухум сариғи ҳисобланади. Улар орасида энг катта хавф туғдирадигани тухум орқали юқадиган Salmonella enteritidis, Salmonella Pullorum, Salmonella gallinarum, Salmonella Typhimurium, Salmonella newport, Salmonella dublin, Salmonella anatum ва бошқалардир.
Сальмонеллёз юқумли ичак касаллиги бўлиб, ўз вақтида даволанмаса, ҳаттоки ўлимга олиб келиши мумкин. Касалликнинг клиник белгилари ичак санчиғи, тана ҳароратининг кўтарилиши, қорин оғриғи ва ич кетиши билан характерланади.
Шу сабабли касаллик белгилари намоён бўлганда зудлик билан шифокорга мурожаат этиш керак.
Касалликни олдини олиш учун:
- сотиб олинган тухумни 1 литр сувга 20 грамм сода солинган эритмада 20 дақиқа ивитиб қўйиш, кейин тоза сув билан чайиш ва дезинфекцияловчи эритма билан ювиш;
- музлаткичда алоҳида тухум учун ажратилган жойда сақлаш;
- қайнатиб пиширишда 15-20 минут қайнатиш, қовуришда эса икки томонини қовуриш;
- шахсий гигиена қоидаларига риоя этиш тавсия этилади.
