Бу ҳақда “UzAuto Motors” акциядорлик жамияти маълум қилди.
Қайд этилишича, шу йил май ойида Президентнинг Хоразм вилоятига ташрифи чоғида “Xorazm Avto” корхонасида янги моделлар ишлаб чиқаришни йўлга қўйиш, ишлаб чиқариш қувватларини модернизация қилиш ва кенгайтириш вазифалари белгилаб берилган эди.
Шундан келиб чиқиб, мижозлар эҳтиёжларига мос янги “Damas” версиясини ишлаб чиқариш режалаштирилди.
Янги Damas модели — шаҳар ичидаги кундалик ҳаракатлар ва тижорат фаолияти учун қулай, ихчам, тежамкор ва сиғимдор автомобиль ҳисобланади. Унинг ўлчамлари каттароқ, юк кўтариш қобилияти оширилган, ҳайдовчи ва йўловчилар учун қулайликлар сезиларли даражада яхшиланди. Модель икки хил кўринишда — Damas Move (йўловчи версияси) ва Damas Max (юк-йўловчи версияси)да ишлаб чиқарилади. Янги модел амалдаги классик Damas билан бир вақтда ишлаб чиқарилади, бу харидорларга икки вариант орасида эркин танлов имконини яратади.
Шу билан бирга, компания энг талаб юқори бўлган Chevrolet Cobalt моделини ҳам тубдан модернизация қилди. Мижозларга икки янги — Cobalt Style MCM ва Cobalt Midnight MCM версиялари тақдим этилмоқда.
"Янгиланган Cobalt модели бўйича Ўзбекистон ва хорижда ўтказилган сўровларда респондентларнинг 90 фоизидан ортиғи завод босқичида замонавий функциялар билан жиҳозлашни талаб қилган, — дейилади хабарда. — Шунга мувофиқ, янги моделда илгари мавжуд бўлмаган 12 та янги функция жорий этилди, жами 50 дан ортиқ асосий компонентлар янгиланди".
Янгиликлар қаторида:
- двигатель ва бошқарув блоклари янгиланади;
- ABS тизимининг такомиллаштирилади;
- хавфсизлик ёстиқчалари учун янги блоклар;
- Android Auto ва Apple CarPlay’ни қўллаб-қувватловчи сенсорли мультимедиа;
- круиз-контрол, олдинги ўриндиқлар иситиш функцияси;
- интерьернинг янги безаклари ва бошқалар бор.
Cobalt моделини ривожлантиришнинг кейинги босқичи — ташқи кўринишини янгилаш (фейслифт) бўлиб, бу йўналишда ишлар аллақачон бошланган. Янги версиялар амалдаги комплектациялар билан бир вақтда ишлаб чиқарилади.
"Энди мижозлар функционаллиги ва жиҳозланиш даражаси билан фарқланувчи тўртта турдаги Cobalt моделидан бирига танлов қила олади", — дейилади хабарда.
Автомобилларнинг нархлари ва сотув бошланиш санаси ҳақидаги маълумотлар кейинроқ эълон қилиниши айтилди.
