«Ўзэнергоинспекция» сўнги бир ҳафтада ўтказилган назорат тадбирларида истеъмолчилар томонидан энергия ресурсларидан ноқонуний фойдаланилган 92 та ҳолат аниқланганини маълум қилди.
Бунда 15,6 млн кВт⋅соат электр энергияси (32,4 млрд сўм) ва 1,8 млн метр куб табиий газ (5,4 млрд сўм) талон-торож қилиниши натижасида жами 37 млрд 921 млн сўм зарар қайта ҳисоб-китоб қилинди.
Шунингдек, истеъмолчилар томонидан энергия ресурсларидан фойдаланиш қоидаларини бузиш билан боғлиқ ҳуқуқбузарлик бўйича 126 та маъмурий иш расмийлаштирилди.
Қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза этувчи органларга тақдим қилинди.
Пойтахтнинг Бектемир туманида жойлашган кўп қаватли уйда электр қурилмалари тармоққа ўзбошимчалик билан уланиб, миллиардлаб сўмлик электр энергияси ноқонуний сарфлангани аниқланди.
Самарқанд вилоятида электр энергиясидан ноқонуний фойдаланиш ҳолатларининг олдини олиш мақсадида “Ҳудудий электр тармоқлари“ АЖ Энергосавдо филиали томонидан тезкор рейд тадбирлари ўтказилди.
“Ҳудудгаз Фарғона“ газ таъминоти филиали комплаенс назорат тузилмалари, шаҳар газ таъминоти бўлими ходимлари ва ҳуқуқ-тартибот органлари ҳамкорлигида Фарғона шаҳрида назорат тадбирлари ўтказилди.
