Ўзбекистон U-17 терма жамоаси ўсмирлар ўртасидаги Жаҳон чемпионатларида 4-бор иштирок этмоқда. Жамоамиз 2011 (Мексика) ва 2023 йилги (Индонезия) мусобақада чорак финалга қадар етиб борган.

2013 йил Бирлашган Араб Амирликларида ўтган мундиалда эса 1/8 финал босқичида иштирокини якунлаган.

Исломбек Исмоилов бошқарувидаги жамоамиз 2025 йилги FIFA U-17 Жаҳон чемпионатининг «J» гуруҳида Парагвай, Ирландия ва Панама ўсмирлар терма жамоаларига қарши баҳс олиб боради. Ўзбекистон футбол ассоциацияси мазкур жамоалар ҳақида маълумот билан ўртоқлашди.

Парагвай

Йўлланма: U-17 Жанубий Америка чемпионати — 5-ўрин

Мундиалдаги иштирок: 5

Энг яхши натижа: Чорак финал (1999, 2019)

Мураббий: Мариано Углессич

Эътиборга лойиқ ўйинчи: Алан Ледесма

Ледесма U-17 Жаҳон чемпионати йўлланмасини қўлга киритишда Парагвай жамоасининг муҳим ўйинчиси бўлди. Жамоа сардори сифатида у майдон марказида ўйинни бошқаради ва курашувчанлиги билан ажралиб туради. У, шунингдек, U-17 Жанубий Америка чемпионатида Парагвай иккита пенальти сериясида ғалаба қозонган ва уларда ўз зарбасини аниқ амалга ошириб, жамоасининг ғалабасига ҳисса қўшди.

Панама

Йўлланма: КОНКАКАФ U-17 саралаш босқичи — гуруҳ ғолиби

Мундиалдаги иштирок: 3

Энг яхши натижа: 1/8 финал (2011)

Мураббий: Леонардо Пипино

Эътиборга лойиқ ўйинчи: Эстевис Лопес

Чап қанот ҳужумчиси — Лопес мураббий Леонардо Пипинонинг тизимида муҳим ўрин тутади. У KONKAKAF У-17 саралаш босқичида Панаманинг учта голида қатнашган, ижодкорлиги ҳамда аниқ ва кучли зарбаси билан ўйинни ўз фойдасига ўзгартира олади. Ҳозирда у Панаманинг «Costa del Este» клубидан «Ривер Плейт» ёшлар жамоасига ижарада ўйнамоқда.

Ирландия

Йўлланма: UEFA U-17 Европа чемпионати финал босқичи қатнашчиси

Мундиалдаги иштироклар: 0

Энг яхши натижа: Йўқ

Мураббий: Колин ЎБрайн

Эътиборга лойиқ ўйинчи: Жейден Умеҳ

Тезкор, ижодкор ва гол уришга мойил ҳужумчи Умеҳ Португалиянинг «Бенфика» клуби сафида тўп тепади. У 2024 йилда Португалияга кўчиб ўтган ва Ирландия бош мураббийи Колин ЎБрайннинг айтишича, у «Бенфика» академиясига қўшилгач, ўйини сезиларли даражада яхшиланган. Умеҳнинг акаси Франко ҳам профессионал футболчи бўлиб, ҳозир Ирландия У-21 терма жамоасида ўйнайди.

Эслатиб ўтамиз, 17 ёшгача футболчилар ўртасидаги FIFA Жаҳон чемпионати жорий йилнинг 3–27 ноябрь кунлари Қатар яшил майдонларида бўлиб ўтади.

Ўзбекистон U-17 терма жамоаси турнир доирасидаги илк учрашувни 5 ноябрь куни Парагвайга қарши ўтказади.