Учрашувда Ўзбекистон ва АҚШ ўртасидаги савдо-ҳуқуқий соҳалардаги ҳамкорликни мустаҳкамлаш, хусусан, аёллар тадбиркорлигини ривожлантириш бўйича қўшма ташаббус ва дастурларни амалга ошириш масалалари муҳокама қилинди.
Сенатор томонидан мамлакатимизда тадбиркорликни, айниқса, аёллар тадбиркорлигини қўллаб-қувватлаш борасида амалга оширилаётган кенг кўламли ислоҳотлар, яратилаётган қулай шарт-шароитлар ҳақида маълумот берилди. Аёллар тадбиркорлиги соҳасида сон ва сифат жиҳатдан ўсиш кузатилаётгани, уларнинг иқтисодий фаоллиги ортиб бораётгани алоҳида таъкидланди.
Делегация аъзолари Ўзбекистонда олиб борилаётган демократик ислоҳотлар, хотин-қизлар ҳуқуқлари ва имкониятларини кенгайтириш борасидаги саъй-ҳаракатларни юқори баҳолаб, АҚШ Савдо вазирлигининг CLDP дастури бу йўналишдаги ҳамкорликни кенгайтиришга тайёрлигини билдирди.
Суҳбат чоғида аёлларнинг тадбиркорликдаги иштирокини қўллаб-қувватлаш, иқтисодий мустақиллигини таъминлаш ва ижтимоий ҳимоясини кучайтириш борасида ҳамкорликнинг истиқболлари ҳақида ҳам фикр билдирилди, деб хабар беради Олий Мажлис Сенати матбуот хизмати.
