Украина Президенти Владимир Зеленский ва Саудия Арабистони валиаҳд шаҳзодаси Муҳаммад бин Салмон Жиддада музокара ўтказди ва сармоявий ҳамкорликни кучайтиришга келишиб олди. Бу ҳақда 11 март, сешанба куни Украина Президенти ва Саудия Арабистони ташқи ишлар вазирлиги сайтларида хабар берилди.
“Украина савдо-иқтисодий ва энергетика соҳаларидаги ҳамкорликни фаоллаштиришдан, шунингдек, Саудия Арабистонининг сармоялари ва мамлакатимизни тиклашдаги иштирокидан манфаатдор. Валиаҳд шаҳзода Украинага ва унинг келажагига сармоя киритиш ниятини тасдиқлади”, деб ёзади Украина томони.
Саудия томонининг таъкидлашича, етакчилар энергетика, озиқ-овқат саноати ва инфратузилма каби соҳаларда “истиқболли сармоявий ва иқтисодий ҳамкорликни йўлга қўйиш орқали сармоявий муносабатларни мустаҳкамлашга қатъийликларини яна бир бор тасдиқлашди”. Зеленский ва бин Салмон, шунингдек, “нефть, газ, уларнинг ҳосилалари ва нефть-кимё соҳаларида ҳамкорлик имкониятларини муҳокама қилиш истагини билдирди”, дея қўшимча қилди Ар-Риёд, деб хабар беради dw.com.
