30 май куни Ўзбекистон Республикаси Президенти Шавкат Мирзиёев ташаббуслари билан янги таъмирдан чиққан ва янги ном олган Ўзбекистон Миллий кино санъати саройида “Баҳодир Ялангтўш” тарихий фильмининг катта тақдимоти бўлиб ўтди.
Мазкур тақдимотда Ўзбекистон Президенти ёрдамчиси Саида Мирзиёева бошчилигидаги меҳмонлар, давлат ташкилотлари вакиллари, журналист ва блогерлар ҳамда кенг жамоатчилик иштирок этди. Намойиш аввалида фильмнинг ижодий жамоаси саҳнага таклиф этилди. Фильм режиссёри Жаҳонгир Аҳмедов сўзга чиқиб, мазкур тарихий киноасарнинг яралишида ўз меҳнатини аямаган барчага миннатдорлик билдирди.
"Баҳодир Ялангтўш" фильми Давлат раҳбари ташаббуслари билан яратилган "Тирик тарих" лойиҳаси доирасидаги илк фильм бўлиб, Кинематография агентлиги буюртмасига биноан Самарқанд вилояти ҳокимлиги билан ҳамкорликда суратга олинган. Фильмда Ўзбекистонда хизмат кўрсатган артистлар Боир Холмирзаев, Матёқуб Матчонов, Беҳзод Муҳаммадкаримов, Тоҳир Саидов каби маҳоратли актёрлар роль ижро қилган. Баҳодир Ялангтўш роли эса спортчи ва актёр Ҳабибулло Низомов томонидан гавдалантирилган. Фильм сценарий муаллифи Ҳасан Тошхўжев, бош продюсерлар Фирдавс Абдухолиқов ва Эркинжон Турдимов, ижрочи продюсер Зафар Йўлдошев.
"Баҳодир Ялангтўш" – суратга олиш жараёнлари битта павильонда бўлиб ўтган ягона фильм. Ушбу фильмнинг яратилиши учун 3D форматдаги экранлар сотиб олиниб, махсус павильон ташкил этилди. Янги панорамали павильон энг юқори замонавий бадиий ва технологик савияда фильмлар суратга олишга ихтисослашган. Stage Craft технология битта павильоннинг ўзида юқори сифатли тасвирга олиш имконини беради.
Маълумот учун, 25 май куни Самарқанд шаҳридаги “Мўжиза” амфитеатрида 3,5 минг нафар томошабиндан иборат кенг жамоатчилик учун ушбу фильмнинг илк премьераси бўлиб ўтди.
