Чақалоқнинг муддатидан олдин ва кам вазн билан туғилиши унинг кейинги ҳаёти давомида саломатлигига салбий таъсир кўрсатиши мумкин. Ана шундай асоратлардан бири бу – ҳомиладорлик даврида она организмининг сурункали шамоллашга чалиниши. Калифорния университети олимлари эса: “Ота-оналарнинг психологик барқарорлиги бундай хавф-хатардан ҳимоя қилишга ёрдам бера оладими” деган савол билан мурожаат қилишган.
Эълон қилинган илмий-тадқиқот иши муаллифлари ота-оналарнинг руҳий кўтаринкилиги, яъни дунёга умид билан қараши, келажакка бўлган юксак ишончи, яқинларининг қўллаб-қувватлови ва ҳаётдаги қийинчиликларни енгиб ўтиш қобилиятини уларнинг ички ресурслари сифатида ўрганишга қарор қилишди. Ва мазкур омиллар ҳомиладорликка катта ижобий таъсир кўрсатишини қайд этишган. Мавзудаги асосий гипотеза шундаки, қайд этилган ресурслар она организми шамоллаши эҳтимолини камайтиради ва ўз навбатида чақалоқнинг соғлом туғилишига катта таянч бўла олади.
Тажрибада 217 жуфтлик қатнашган. Натижалар эса ўта янги хулосаларни беради. Маълум бўлишича, отанинг психиологик ҳолати она организмидаги биологик жараёнларни бевосита кўрсатади. Отанинг барқарорлик ресурслари (руҳий кўтаринкилик, ўзига ишонч) қанчалик юқори бўлса ҳомиладор аёлдаги С-реактив оқсил даражаси шунча паст бўлар экан. Бу эса муддатидан олдин туғиш эҳтимолини пасайтиради.
Муҳим жиҳат: расмий никоҳ бу борада муҳим омил эканлиги маълум бўлди. Никоҳдан ўтмасдан, бир жойда шунчаки эр-хотин бўлиб яшашда эса оила, эр-хотин мажбуриятлари норасмий тус олади ва ҳеч қандай ижобий натижа бермайди. Отанинг психологик барқарорлигини кучайтитиришга ижобий самара берадиган омилларни йўққа чиқаради.
Тадқиқот жараёнида онанинг барқарорлик ресурслари организмнинг шамоллаш даражасига ҳам, ҳомила туғилиш натижасига ҳам деярли таъсир кўрсатмаган. “Отанинг ҳаётга кўтаринки руҳ билан қараши ва қийинчликларни енгиб ўтиш лаёқати каби кучли жиҳатлари биологик усуллар орқали бутун оила аъзоларига ўтиши мумкинлигини номоён этган илк тадқиқотлардан бири” дейди профессор Женифер Хон-Холбрук.
Тадқиқотчилар фикрича, отанинг хавотирда бўлиши, ўзига бўлган ишончнинг сусайиши, тушкунликка тушиши она организмида стресс гормонлари ошишига ва асаб тизими бузилишига сабаб бўлади. Натижасини эса тасаввур қилиш қийин эмас, деб ёзади ria.ru.
