Беттани Хьюз Бутунжаҳон туризм ташкилоти (UNWTO) Бош ассамблеясининг 25-сессияси доирасида Ўзбекистонга ташриф буюрган. У “Болиголов косаси: Суқрот, Афина ва яхши ҳаётни излаш” (“The Hemlock Cup: Socrates, Athens and the Search for the Good Life”), “Истанбул: Уч шаҳар ҳақида эртак” (“Istanbul: A Tale of Three Cities”), “Венера ва Афродита” (“Venus and Aphrodite”) каби асарларнинг муаллифи ҳисобланади.
Беттани Хьюзнинг маълум қилишича, ҳозирда у ижодий жамоаси билан “Ўзбекистон хазиналари” (“Treasures of Uzbekistan”) мавзусидаги катта лойиҳа устида иш олиб боряпти.
Мазкур лойиҳа доирасида Ўзбекистоннинг қадимий манзиллари ҳамда мамлакатнинг туристик салоҳиятини намойиш этувчи фильмлар тасвирга олинади. Бу эса ўз навбатида, юртимизнинг сайёҳлик имкониятларини бутун дунё бўйлаб янада танитишга туртки бўлиши кутиляпти.
Тегишли шартнома томонлар ўртасида имзоланганидан сўнг, ижодий жамоа тасвирга олиш жараёнларини жорий йил май ойидан бошлайди, деб хабар беради “Дунё” АА.
Маълумот учун, “StandStone Global” ташкилоти дунё бўйлаб тарихий манзилларга доир кенг таъсирга эга фильмларни суратга олади. Ташкилот томонидан тасвирга олинган фильмлар National Geographic Channel, SBS, BBC, ITVBe ва бошқа кўплаб нуфузли тармоқларда даврий узатиб борилади. “StandStone Global” томонидан тарихий манзилларга доир фильмлар Испания, Португалия, Венгрия, Туркия, Полша, Ҳиндистон, Малайзия, Индонезия, Озарбайжон, Грузия ва бошқа мамлакатларда тасвирга олинган.
