2022 йилда қишлоқ хўжалиги соҳасида жами 198 та текшириш ўтказилиб, натижасига кўра 324 та прокурор назорати ҳужжати қўлланди, 507 та шахснинг (шундан 454 таси юридик шахс) ҳуқуқи тикланди.
Чорвачилик ва паррандачилик соҳасида ўтказилган 15 та текшириш натижасига кўра 23 та прокурор назорати ҳужжати қўлланди. Қонун бузилишини бартараф этиш бўйича 16 та тақдимнома киритилиб, 5 та жиноят иши қўзғатилди.
Масалан, “Ўзсаноатқурилишбанк”нинг Хоразм филиали томонидан “Х.м.s.” масъулияти чекланган жамиятига 2019 йил 13 ноябрда паррандачилик ускуналари сотиб олиш учун 5 йил муддатга 7,3 фоиз устама тўлаш шарти билан 201 000 АҚШ доллари миқдорида кредит ажратилган. Мазкур жамият кредит эвазига Хитойнинг Хонжой шаҳридаги корхонадан 50 мингта парранда ва 20 мингта тухумга мўлжалланган ускуналарни қабул қилиб олган бўлса-да, 19 800 та паррандага ҳамда 5280 та тухумга мўлжалланган ускуналар жамият раҳбари Ж.Я. томонидан қурилиши якунланмаган бинога ўрнатилиб, фойдаланилмай кераксиз буюмдай ташлаб қўйилган.
Ўрганишда ускуналарнинг бугунги кундаги бозор баҳоси 101 563 АҚШ доллари экани, қиймати 99 437 доллар бўлган ускуналар сотиб юборилиб, жуда кўп миқдордаги кредит талон-торож қилингани аниқланган.
Мазкур ҳолат юзасидан “Х.м.s.” МЧЖ раҳбари Ж.Я. ҳамда “Ўзсаноатқурилишбанк”нинг Хоразм филиали мансабдорларига нисбатан жиноят иши қўзғатилган.
Бундан ташқари, вилоят бўйича чорвачиликнинг барча тармоқларида 1085 та хўжалик фаолият кўрсатмоқда, уларга ем-хашак учун жами 20 920 гектар ер ажратилган.
Текшириш давомида қатор қонун бузилишлари аниқланди. Жумладан, Ер кодексининг 461-моддасида чорвачилик маҳсулотини ишлаб чиқаришга ихтисослашган фермер хўжалиги ва бошқа юридик шахсларга озуқа экинларини етиштириш учун (битта қорамол учун) суғориладиган ерлардан камида 0,3 гектардан ер ажратиб бериш белгиланган бўлса-да, қорамолчилик йўналишидаги 162 та фермер хўжалигига 2527 гектар ер ортиқча ажратиб берилгани ва 8091 та мол етишмаслиги аниқланди.
Чорвачиликка ихтисослашган фермер хўжаликлари томонидан 12 156 гектар ерга экин экилиши белгиланган бўлса-да, 7761 гектар ерга ем-хашак экини экилиб, қолган 4395 гектар ерга бошқа экинлар экилган.
Юқоридаги қонун бузилиши ва унинг сабабларини бартараф этиш бўйича 11 та тақдимнома киритилди. Судларга 16 та даъво аризаси киритилиб, 39 та фермер хўжалигининг 533,4 гектар ери давлат захирасига қайтарилди. Бу каби чоралардан кўзланган мақсад қишлоқ хўжалиги, хусусан, чорвачилик йўналишида қонун устуворлигини таъминлаш, шу орқали соҳа ривожига ҳисса қўшишдир.
