Спортчи қайд этган 71.83 метр натижа унга қитъа чемпионатининг кумуш медалини келтирди.
Таиландда ўтаётган Енгил атлетика бўйича Осиё чемпионатида Ўзбекистон терма жамоаси илк медалини қўлга киритди, деб ёзмоқда Ёшлар сиёсати ва спорт вазирлиги ахборот хизмати. Эркаклар ўртасида босқон улоқтириш дастурида иштирок этган Суҳроб Хўжаев кумуш медалга сазовор бўлди.
Ҳамюртимизнинг иккинчи уринишда қайд этган 71.83 метр натижаси унга қитъа чемпионатининг кумуш медалини келтирди. Биринчи ўрин хитойлик Ван Сига насиб этган бўлса, япониялик Шота Фукуда кучли учликни якунлаб берди.
Енгил атлетика бўйича Ўзбекистон терма жамоаси аъзоси, ярим марафон бўйича миллий рекорд соҳиби Шоҳруҳ Давлатов марафон дастурида (42 км, 195 метр) Париж-2024 Олимпиада нормативини бажаришга муваффақ бўлди.
Енгил атлетиканинг уч ҳатлаб сакраш йўналиши бўйича ёшлар ўртасида Осиё ва жаҳон чемпиони, Коня-2021 Ислом бирдамлиги ўйинлари ғолиби Шарифа Давронова Осиё енгил атлетика ассоциацияси томонидан “Йилнинг энг яхши ёш енгил атлетикачиси” деб топилди. Бу ҳақда Ўзбекистон Миллий Олимпия қўмитаси маълум қилди.
