АОКАда ўтказилган брифингда Оила ва хотин-қизлар қўмитаси ахборот хизмати раҳбари Саодат Боймирзаева хотин-қизларнинг ижтимоий, сиёсий ва иқтисодий фаоллигини ошириш борасида амалга оширилаётган ишлар юзасидан маълумот берди.
Мутахассисга кўра, 2025 йил давомида криминоген вазияти оғир маҳаллаларда ижтимоий ҳимояга муҳтож хотин-қизларнинг рўйхатларини шакллантириш, хотин-қизларнинг муаммоларини ўрганиш ва ҳал этиш чораларини кўриш бўйича Бош вазир ўринбосари-Оила ва хотин-қизлар қўмитаси раиси бошчилигидаги ишчи гуруҳ таркиби ҳамда ҳудудларда ўрганиш ишларини олиб бориш режа-графиги тасдиқланди.
Эндиликда ҳар ойда режа-график асосида ҳудудларда ишлар ташкил этилади, ижтимоий ёрдамга муҳтож хотин-қизларнинг рўйхатлари шакллантирилиб, хотин-қизларнинг муаммоларини ҳал этиш чоралари кўриб борилади.
Хотин-қизлар ўртасида ва оила-турмуш муносабатлари доирасида ҳуқуқбузарликларнинг барвақт олдини олиш бўйича “Хўжайли тажрибаси” яратилиб, республиканинг барча ҳудудларига татбиқ этилди.
Шунингдек, Пиллачилик соҳасида ишлаш истагида бўлган хотин-қизларни қисқа муддатли ўқув курсларида ўқитиш ва уларнинг ушбу соҳада бандлигини таъминлаш бўйича чора-тадбирлар режаси ишлаб чиқилиб, барча ҳудудларда ижрога қаратилди.
