Заҳириддин Муҳаммад Бобур ролини маҳоратли актёр Илҳом Бердиев ижро этган. Актёр фильм ҳақидаги таассуротларини сўзлаб берди:

“Мазкур фильмда иқтидорли ёш режиссёр Бобур Шер ўғли билан бирга ишладик. У ёш бўлишига қарамай, буюк аждодимиз Заҳириддин Муҳаммад Бобур ҳақида ҳужжатли фильмни суратга олишга қўл урди. Шу ўринда тарихшунос олимлар билан ҳам музокаралар олиб борилди.

Мен кинокартинада кўплаб актёрлар орзу қиладиган бош образни ижро этдим. Воқеалар асосида бобомизнинг мураккаб шахс эканлиги, ўз навбатида сирли ва ҳар томонлама кучли эканлиги очиб берилган.

Бобур бобомиз ҳаётлик чоғида чуқур дард ва ҳасрат билан яшайди, атрофдагиларнинг хоинлигига учрайди. Суратга олиш жараёнларида мен бобомизнинг ана шу дардини ҳис қилиб, ижро орқали чиқариб беришга ҳаракат қилдим. Ўзим неча йиллар давомида Бобурнинг ижодига қизиқиб келардим ва асарларини ҳам кўп ўқиганман.

Давлатимиз раҳбари томонидан шу каби ҳужжатли фильмларни яратилишига эътибор қаратилиши ватандошларимизга ўзгача шукуҳ бағишлайди. Ишонаманки, Бобур ҳақида бошқа бадиий фильмлар, сериаллар ҳам суратга олинади”